Дін қызметкерлері аттестаттаудан өтті

Қазіргі кезде дін қызметкеріне қойылатын талап жоғары. Имам діни біліммен қатар, мемлекеттік заңды жетік меңгеріп, қоғамдағы өзгерістерден де хабардар болуы тиіс. Осы бағыттағы қарым-қабілетін саралайтын кезекті аттестаттау бүгін Қостанай қаласында өтті. Оған аудан-қала мешіттерінен жиналған 70-тен астам имам қатысты.

Үш жылда бір рет келетін кезекті аттестаттаудан өту үшін өңірдің түкпір-түкпірінен келген имамдар Қостанайдың бас мешітіне жиналды. Емтихан барысында дін қызметкерлерінің шариғи білімі, заңнаманы меңгеруі және кәсіби дайындығы тексерілді.