Тәжік-ауған шекарасында қаза тапқан боздақтарды еске алу – ел жадындағы қасиетті парыздың бірі. Осы мақсатта 6697 әскери бөлімінде тағылымды әрі мәні терең іс-шара ұйымдастырылды. Жиынға мектеп оқушылары мен колледж студенттері қатысып, Отан үшін жанын қиған ерлердің ерлігін тағы бір мәрте жүрекпен сезінді. Бұл кездесу – өткенге тағзым етіп қана қоймай, келешек ұрпақтың бойына елдік рухты сіңірудің жарқын үлгісі болды.
Іс-шара барысында қатысушыларға тәжік-ауған шекарасындағы қақтығыстарда қаза тапқан сарбаздардың өмір жолы мен ерлік істері баяндалды. Жас ұрпақ олардың қайсарлығы мен батылдығын тыңдай отырып, бейбіт өмірдің бағасын тереңірек ұғынды. Әскери бөлім қызметкерлері де өз тәжірибелерімен бөлісіп, Отан алдындағы борыштың қасиетті екендігін ерекше атап өтті. Мұндай тағылымды әңгімелер жастардың жүрегіне жігер мен мақтаныш ұялатары сөзсіз.