Қуыршақ спектаклі қалай туады?

Сахна шымылдығы түріліп, ертегі кейіпкерлері көрерменмен қауышқанға дейін қаншама еңбек атқарылады. Спектакльдің дүниеге келуі – режиссердің ойынан басталып, суретші қиялымен түрленіп, шеберлер қолымен жүзеге асатын күрделі үдеріс. Әсіресе қуыршақ театрында әр кейіпкерге жан бітіріп, оны көрерменге жақындатудың өзіндік сыры бар. Алғашқы нобайдан бастап, дайын қойылымға дейінгі жол қалай өтеді? Қостанай облыстық қуыршақ театрының сахна сыртындағы тіршілігіне бірге үңіліп көрейік. 

Қуыршақтар театрының қойылымы, шеберханада басталады. Алдымен шығарма таңдалып, оның көркемдік шешімі айқындалады. Режиссер мен суретші кейіпкерлердің бейнесін, қуыршақтардың құрылымы мен сахна көрінісін бірлесе әзірлейді. Өйткені мұнда қуыршақтың сыртқы келбеті ғана емес, оның сахнада қалай қимылдап, көрерменге қандай әсер қалдыратыны да маңызды. 

Режиссердің идеясы нақтыланған соң, іске суретшілер кіріседі. Алдымен қағаз бетінде туған кейіпкерлер кейін матадан, ағаштан және өзге де материалдардан жасалады. Әрбір эскиз режиссермен бірлесе талқыланып, ортақ шешім қабылданған соң ғана іске асырылады.

Дайын қуыршаққа жан бітіріп, оны сахнада сөйлету – актердің міндеті. Ол кейіпкердің мінезіне сай дауыс тауып, әр қимылын үйлестіреді. Өйткені әрбір қозғалыс кейіпкердің мінезін танытып, кішкентай көрерменді ертегі әлеміне жетелейді.

Осылайша, режиссердің идеясы, суретшінің қиялы мен шеберлердің еңбегі бір сахнада тоғысады. Жарық пен музыка, актерлік ойын үйлесіп, ертегі әлемі жанданады. Ал көрерменге ұсынылған әр қойылымның артында тұтас ұжымның тынымсыз еңбегі мен ізденісі жатыр.