Қостанайда нөсер жауын салдарынан көлік қозғалысы қиындап, бірқатар көшелерде су жиналды. Тұрғындар су басқан аумақтардың фотосуреттері мен бейнежазбаларын әлеуметтік желілерде бөлісті.
Мамандардың мәліметінше, бір тәулікте 37,5 мм жауын-шашын жауған. Бұл маусым айындағы орташа айлық норманың 101,3 пайызын құрады. Кейбір тұрғындар суды кешіп өткенде көліктерінің мемлекеттік тіркеу нөмірлерін жоғалтып алғандарын айтуда. Әлеуметтік желілерде жарияланған бейнежазбаларда кейбір қиылыстарда су жиналып, көлік қозғалысының баяулағаны анық көрінеді. Қала әкімдігі қазіргі уақытта жолдар мен аулаларда су жиналу фактілері жоқ екенін мәлімдеді. Ведомствоның хабарлауынша, су бұру жүйесі жауын-шашынның мол көлеміне қарамастан негізгі жүктемені көтерген.