Қостанай облысында ауа райына байланысты ескерту жарияланды. Құтқарушылар күшейтілген кестеде жұмыс істеп жатыр. Арқалық қаласынан 7 шақырым жерде жергілікті маңызы бар автомобиль жолында қар құрсауында қалған автокөлікті шығарып алды. Жеңіл көлік ішінде бір адам болған.
Құтқарушылар оқиға орнына жедел келіп, автокөлікті жолдың тазартылған учаскесіне сүйреп апарды. Жүргізушіге медициналық көмек қажет болмаған. Төтеншеліктер жүргізушілерге қыс мезгілінде жолдарда барынша абай болу қажеттігін ескертеді. Ауа райының жағдайын ескеріп, өзімен бірге қысқы жол жүру үшін қажетті жиынтықты алып жүріп, автомобильдің жай-күйін үнемі тексеріп отыру керектігін айтады. Бұған дейін облыс аумағында дауылды ескерту жариялаған болатын. Алдағы тәулікте де Қостанай облысының солтүстігінде, шығысында қатты қар жауып, бұрқасын күтілетіні хабарланды. Күндіз бұл құбылыс облыстың шығысында қайталанғалы тұр, көктайғақ күтіледі. Оңтүстік-батыстан соғатын жел солтүстік-батысқа ауысып, екпіні 15-20 секундтан асады деп болжанып отыр. Қостанай облысының солтүстігінде, шығысында, оңтүстігінде бұрқасын күтіледі. Батыста тұманды ауа райы болады. Солтүстік-батыстан ұйтқып жел соғады, жылдамдығы кей уақыттарда 23-28 метрге дейін жетеді. Ауа температурасы 23-28, облыстың оңтүстігінде, шығысында 20 градус аязға дейін күрт төмендеуі мүмкін.